Þrjú verkefni hlutu styrk til endurheimtar votlendis 17. maí 2010

Auðlind-Náttúrusjóður veitti sína fyrstu styrki til verndunar og endurheimtar votlendis í Þjóðminjasafni Íslands mánudaginn 17. maí. Frú Vigdís Finnbogadóttir, verndari sjóðsins afhenti styrkina, en Þröstur Ólafsson, formaður Auðlindar hélt erindi um stefnu og starfsemi sjóðsins. Styrkþegar að þessu sinni voru Fuglavernd fyrir verkefnið ,,Votlendisendurheimt – Friðlandið í Flóa, Sigurkarl Stefánsson fyrir verkefnið Endurheimt votlendis í landi Setbergs í Litla Langadal á Skógarströnd og Norræna húsið fyrir verkefnið ,,Friðlandið í Vatnsmýrinni“. Markmið verkefnis Fuglaverndar er að fylla upp í 730 m langan skurð sem liggur um miðbik Friðlandsins í Flóa við bakka Ölfusár, sem Fuglavernd hefur haft umsjón með síðan 1997. Þannig vilja styrkþegar færa landið aftur í fyrra horf, endurheimta votlendi, binda kolefni og auka fjölbreytni lífríkis, þar á meðal fuglalífs. Markmið verkefnis Sigurkarls er að endurheimta um 1 ferkílómeters votlendisflóa, sem ræstur var fram í dalbotninum fyrir um 35 árum síðan. Til þess þarf að fylla í skurði og tempra úrrennsli úr þeim og rof af völdum Setbergsár. Í framhaldi verður sett upp skilti þar sem árréttað verður að endurheimta votlendið sé griðland allra lífvera sem þar finnast. Verkefnið ,,Friðlandið í Vatnsmýrinni“ er samstarfsverkefni Norræna hússins, Háskóla Íslands, Reykjavíkurborgar og Fuglaverndar. Markmið verkefnisins er að endurbæta Friðlandið í Vatnsmýrinni með því að bæta vatnafar svæðisins, uppræta ágengar plöntur, endurhanna austasta hluta friðlandsins og setja upp fræðsluskilti um friðlandið og lífríki þess. Friðlandið í Vatnsmýrinni gegnir þýðingarmiklu hlutverki fyrir fuglafánu Tjarnarsvæðisins. Þar er varpland, uppeldisstöð og veturseturstaður fugla af fjölbreyttum tegundum. Til að fuglar sæki inn á friðlandið í meira mæli þá þurfa þar að vera búsvæði við þeirra hæfi en skki síst friður og öryggi fyrir fuglana. Gróðurfar svæðisins verður fært í sem næst upprunalegt horf og ágengar plöntur fjarlægðar. Fjarlægja á verulegt magn af uppfyllingu á austurhluta svæðisins og stækka þar með votlendið.

Auðlind veitir styrki til endurheimtar og verndar votlendis

Mánudaginn 17. maí kl 16:00 mun Auðlind-Náttúrusjóður veita sína fyrstu styrki til verndunar og endurheimtar votlendis. Athöfnin fer fram í bíósal Þjóðminjasafns Íslands. Samkvæmt dagskrá mun frú Vigdís Finnbogadóttir afhenda styrkina og Þröstur Ólafsson, formaður Auðlindar halda erindi um stefnu og starfsemi sjóðsins. Athöfnin er öllum opin. Dagskrá athafnarinnar: Kl. 16:00 Setning Kl. 16:05 Verndari Auðlindar, Vigdís Finnbogadóttir, úthlutar styrkjum Kl. 16:25 Þröstur Ólafsson, stjórnarformaður Auðlindar kynnir starfsemi Auðlindar-Náttúrusjóðs og stefnumörkun. Kl. 16:45 Tónlistarflutningur.

Umsóknafrestur framlengist til 5. mars

Frestur til að senda inn umsóknir í Auðlind - Náttúrusjóð framlengist til föstudagsins 5. mars næstkomandi.

Efni sem þarf að koma fram á umsóknum

Vegna ákveðinna tæknilegra erfiðleika með birtingu umsóknareyðublaðsins verða teknar til greina allar umsóknir sem hafa eftirfarandi liði til viðmiðunar. Bendum umsækjendum einnig á úthlutunarreglurnar sem birtar eru hér á vefnum (undir Auðlind). Það sem fram þarf að koma á hverri umsókn er: • Heiti verkefnis og staðsetning • Nafn, heimilisfang, sími og netfang umsækjanda og ábyrgðarmanns • Upphæð sem sótt er um • Kennitala og bankareikningur umsækjanda • Tengiliður verkefnisins, ef annar en umsækjandi • Hnitmiðuð lýsing á verkefni; markmið, aðgerðir, tímaáætlun, • Kostnaðarliðir og kostnaðaráætlun (tafla) • Skýringar á einstökum kostnaðarliðum • Fjármögnunarliðir og fjármögnun (tafla) • Upplýsingar um mótframlög og styrki frá umsækjanda og öðrum • Annað sem umsækjandi óskar að koma á framfæri, s.s. listi yfir fylgigögn, umsagnaraðilar, lýsing á reynslu sambærilegra verkefna, yfirlýsing um fyrirhugaða nýtingu þess svæðis sem verkefnastyrkur nær til ef um votlendi er að ræða. • Óskar umsækjandi eftir að fá fylgiskjölin endursend (já/nei) • Dagsetning og undirskrift

Auðlind-Náttúrusjóður auglýsir eftir umsóknum um styrki úr sjóðnum fyrir árið 2010.

Auglýst er eftir umsóknum um styrki fyrir verkefni sem tengjast áherslum Votlanda. Vötlönd eru áhersluverkefni Auðlindar sem snýr að verndun og endurheimt votlendis. Umsækjendum er bent á að skoða úthlutunarreglur sjóðsins sem birtar eru hér á vef sjóðsins. Heildar upphæð sem til úthlutunar er að þessu sinni er kr. 1,500.000. Hámarksfjárhæð styrkja fer eftir fjölda umsókna en þó ekki hærri en kr 500.000. Upphæð styrks getur numið allt að 50% hluta kostnaðar við vinnu, tæki og kaup á aðföngum. Einungis verður tekið við umsóknum á þar til gerðum eyðublöðum, sem birtast hér á vef Auðlindar innan skamms. Umsóknafrestur er til og með 1. mars 2010 og er stefnt að því að úthlutað verði úr sjóðnum í apríl. Umsóknir skal senda Auðlind-Náttúrusjóð, Pósthólf 101, 802 Selfossi Fyrirspurnum má beina á netfangið audlind@audlind.org